الشيخ النوي

-يا بليس يرحم والديك واش راه صاير في بيت الافلان.

-واش راه صاير؟ امور عادية كي العادة راك تعرف الافلان.

-واش نعرف عييت نفهم مافهمت والو خلوطة يا صاحبي على هاذي راني نسقسي.

-ايا روح سقسي وانا نجاوب.

-جمال وليد عباس واش بيه؟

-مابيه والو راه زاهي هاذ النهارات كيما تقولو انتوما راهي شاعلتلو.

-وفي رايك تبقى شاعلة اللامبة ولا كيفاش؟

-اواه يا شيخ اللامبة عمرها ماتبقى شاعلة خاصة في الافلان والتاريخ يشهد لوكان جات تدوم تدوم للمرحوم مهري وزيد ولد عباس امين خاص ماراهوش عام.

– هاذي مافهمتهاش ماذا بيك تفهمهالي.

-ياخي راس الحربة في الافلان يسموه الامين العام؟

-ايه.

ولد عباس امين خاص يكمل نهارات ويروح كان عندو حلم واليوم راه في مرحلة التحقيق ونخبرك الايام القادمة راهي مخبيتلو كثير من المفاجآت.